ياسر الطوبجى: "حسبى الله ونعم الوكيل فى المواقع اللى بالغت فى أزمة مرضى"

أكد الفنان ياسر الطوبجى، أنه أجرى عملية استئصال الورم بالقولون منذ 6 أشهر وبالتحديد يوم 27 يناير، وبعدها مباشرة بدأ رحلة العلاج التي تستمر 6 أشهر، وقد قاربت على الانتهاء، موضحا أنه سيستأنف نشاطه الفنى ويعود لحياته بشكل الطبيعى بمشيئة الله فى القريب العاجل.

وقال الطوبجى في مداخلة هاتفية لتليفزيون اليوم السابع: "هناك مواقع أزعجبتنى بعد نشرها أخبار مرضى بطريقة مبالغة فيها.. الناس دى بقولهم حسبى الله ونعم الوكيل فيهم للأسف الشديد، فيه مواقع أخدوا خبر مرضى وبالغوا فيه وكتبوا كلام سيئ يقلق أسرتى وأقاربى.. يعنى حرام عليهم يعنى المريض ده نفسيته بتبقى سيئة من العلاج.. أنت كمان بتدوس عليه بزيادة بالأخبار الكاذبة التي أنت بتنشرها وكل ده عشان الريتش.. يكتبوا عليا الرجل ده بيموت.. كل حاجة بتاعت ربنا ولكل أجل كتاب.. وطبعا دى مواقع صفرة وللأسف ده بيخض الناس ويخض أقاربك.. و يقولوا هو ياسر ماله هو دخل المستشفى تانى.. حسبى الله ونعم الوكيل".

ياسر الطوبجى: بشكر كل زملائى الفنانين وأصحابى اللى زارونى فى المستشفى

وتابع الطوبجى حديثه قائلا: "أنا بصراحة كنت خايف من موضوع المنظار في البداية، وبعدين قولت نعمل أشعة مقطعية ونعمل بدائل كدة.. وفى النهاية الجراحين بيكونوا مختلفين عن دكاترة الباطنة.. بيبصوا على البطن بشكل مختلف.. ففيه جزء شك فيه كدة في القولون فقالى إحنا محتاجين ضرورى نعمل منظار.. الموضوع بدأ معايا بمغص شديد وقعدت فترة بتعالج على أساس إنه إلتهابات في البطن.. واكتشفنا الموضوع بقى واللى عرف في البداية إخواتى وأسرتى كانوا مخبيين عليا وكلمت أنا المعمل بقى وعرفت بنفسى".

وعن أبرز الفنانين الذين قاموا بزيارته في المستشفى، قال الطوبجى: "كل الدنيا من زملائى جولى في المستشفى لما عرفوا وأنا بشكر نقابتى.. نقابة المهن التمثيلية.. بشكر أستاذ أيمن عزب.. وبشكر الدكتور أشرف زكى، لما عرف الموضوع في البداية قالى لأ إحنا مش محتاجين أي حد.. إحنا محتاجين ناس متخصصة.. وهما بيبشرونى بالخير وإن شاء الله قريب جدا أنهى رحلة العلاج".