ياسر الطوبجى: قربت أتعافى من المرض وبعض الدكاترة قالوا لى دى التهابات

أكد الفنان ياسر الطوبجى قربه من إنتهاء رحلة علاجه من مرض سرطان القولون، موضحا عبر مداخلة هاتفلية لتليفزيون اليوم السابع، أنه ظل 6 شهور يعانى من مغص شديد وأخطره بعض الأطباء أنه مجرد التهابات في البطن، حتى عرف عن طريق الصدفة من طبيب أخر كان يعالج زوجته.

وقال الفنان ياسر الطوبجى في مداخلة هاتفية لتليفزيون اليوم السابع: "ربنا لطف بيا بعد إصابتى بسرطان القولون، وعرفت بالصدفة.. أنا الحمد لله فى لطف كبير من الله.. ربنا نجانى من الموضوع ده.. والحمد لله أنا في فترة التعافى دلوقتى وبفضل دعوات الناس والحب الكبير اللى لمسته إخواتى وأسرتى وحبايبى وزمايلى وكل الناس اللى دعمونى.. وبشكر الناس كلها اللى دعتلى بظهر الغيب.. وإن شاء الله ربنا يتم الشفاء على كل خير".

وأضاف الطوبجى لتليفزيون اليوم السابع قائلا: "أسرتى أخفت عنى الخبر، هما عرفوا الموضوع قبلى.. وربنا بعتلى دكتور في الوقت المناسب كان بيعالج مراتى أصلا.. وربنا بعتهولى في التوقيت ده عشان يقابلنى أنا ويشوفنى.. وكان قبلها بـ 6 شهور بتعالج مع دكاترة تانيين وماكنوش واخدين بالهم من المرض ده تماما".

ياسر الطوبجى: بشكر كل زملائى الفنانين وأصحابى اللى زارونى فى المستشفى

وتابع الطوبجى حديثه قائلا: "أنا بصراحة كنت خايف من موضوع المنظار في البداية، وبعدين قولت نعمل أشعة مقطعية ونعمل بدائل كدة.. وفى النهاية الجراحين بيكونوا مختلفين عن دكاترة الباطنة.. بيبصوا على البطن بشكل مختلف.. ففيه جزء شك فيه كدة في القولون فقالى إحنا محتاجين ضرورى نعمل منظار.. الموضوع بدأ معايا بمغص شديد وقعدت فترة بتعالج على أساس إنه إلتهابات في البطن.. واكتشفنا الموضوع بقى واللى عرف في البداية إخواتى وأسرتى كانوا مخبيين عليا وكلمت أنا المعمل بقى وعرفت بنفسى".

وعن أبرز الفنانين الذين قاموا بزيارته في المستشفى، قال الطوبجى: "كل الدنيا من زملائى جولى في المستشفى لما عرفوا وأنا بشكر نقابتى.. نقابة المهن التمثيلية.. بشكر أستاذ أيمن عزب.. وبشكر الدكتور أشرف زكى، لما عرف الموضوع في البداية قالى لأ إحنا مش محتاجين أي حد.. إحنا محتاجين ناس متخصصة.. وهما بيبشرونى بالخير وإن شاء الله قريب جدا أنهى رحلة العلاج".