شريف محمد نجم: والدى الوحيد اللى صنع نجوميته من المسرح فقط وأسس كيانا باسمه

أحيا تليفزيون اليوم السابع الذكرى السابعة لرحيل نجم الكوميديا، وأحد أساطير المسرح محمد نجم، حيث أجرى مداخلة هاتفية مع نجله الوحيد الفنان شريف محمد نجم، ليتحدث عن أبرز ذكرياته وكواليس مسرحياته، وسر إهتمامه الشديد بالمسرح على حساب السينما والدراما التليفزيونية.

شريف محمد نجم: والدي الراحل أطيب وأحن إنسان

وقال الفنان شريف محمد نجم لتليفزيون اليوم السابع: "لو هتكلم عن النجم الكبير الراحل محمد نجم هبقى عايز ساعات كتير جدا أتكلم عنه.. لكن اللى الجمهور ما يعرفهوش إن هو أطيب إنسان وأحن إنسان واللى كان على المسرح شىء وفى البيت شىء تانى خالص.. يعنى راجل بمعنى الكلمة.. طبعا أنا شهادتى مجروحة عشان ابنه.. لكن أنا والله بتكلم بكل صدق.. راجل بمعنى الكلمة عرف يربى ويأسس أسرته كويس.. وعرف من مجهوده يأسس مسرح كبير اسمه مسرح نجم.. فيه فنانين كبار مالهمش مسارح بإسمهم.. إنما الأستاذ محمد نجم ضحى بالسينما وضحى بالفيديو عشان المسرح.

الراحل محمد نجم كان بيرمى الإيفيه ويشوف صداه فى نفس الوقت

وأضاف شريف قائلا: "الفنان محمد النجم كان بيقول أنا فى المسرح باخد التقييم بتاعى وقتى.. برمى الإيفيه بشوف صداه فى نفس الوقت.. لكن أنا بقى بعدين لما أعمل فيلم سينما على ما يتصور ويتمنتج وبعدين الناس تخش الفيلم ويقولوا حلو ولا وحش يكون فات سنتين".

والدي النجم الوحيد فى الوطن العربى اللى صنع نجوميته من المسرح

وتابع الفنان شريف محمد نجم حديثه لتليفزيون اليوم السابع قائلا: "دى فلسفة النجم الراحل محمد نجم عشان كدة هو حابب المسرح وعملاق الفن يوسف وهبى قالك المسرح أبو الفنون.. محمد نجم النجم الوحيد فى الوطن العربى اللى صنع نجوميته من المسرح فقط وهو فرع واحد من الفنون، عكس النجوم الكبار عادل إمام وسمير غانم ومحمد صبحى عملوا مسرح وسينما وتليفزيون".